VOCES DE GALICIA

Temos en Galicia 313 municipios e 3.772 parroquias civís, nas que vivimos máis de 2.710.000 persoas. A maioría facémolo en cidades, pero son aínda moitos os pobos que preservan unha forma de vida máis apegada á terra e a tradición. Con frecuencia, moi preto das capitais de provincia. Xunto a Pontevedra temos os exemplos de Meis e Poio. En Meis está o Mosteiro de Santa María de Armenteira, onde San Ero pasou 300 anos escoitando a un merlo. En Poio, o pobo mariñeiro de Combarro, municipio independente ata hai un século, é hoxe unha das nosas vilas mariñeiras máis bonitas. Non está lonxe a Ermida da Lanzada, onde hai que ir en San Xoán ou o último sábado de agosto a tomar as nove ondas para que nove meses despois nazan novos galegos e galegas.