VOCES DE GALICIA

Hai non tanto, case todos os camiños do país enchíanse desde antes do amencer de carros tirados por bois. Cada un deles emitía un renxer propio, un “canto” do que era responsable a fricción do eixe contra a “cantadeira”, unha peza de madeira. Ese son era moi útil para evitar atoparse con outro carro en contra por unha mesma senda estreita, e mesmo permitía identificar de lonxe ao propietario do vehículo. Pero sobre todo, era parte inseparable das sinfonías diarias dos nosos campos.